GAUEKO

Ipuin-lapurreta lurralde mitologikoan

Sartu crowdfunding-era Nola jolasten da?

Gauekok ipuinak lapurtu ditu

Euskal Herriko izaki mitologikoek biziki maite dituzte ipuinak, eta gauero irakurtzen dute bat lokartu aurretik. Gaur iluntzean, ordea, Gaueko izeneko izaki misteriotsu bat Mari, Basajaun, Tartalo eta Lamiaren etxeetara sartu eta hauen ipuinak lapurtu ditu.

Baina oso irakurzalea da Gaueko, eta ezagutzen ditu jada lapurtutako ipuin guztiak. Ez uste, baina, horregatik ipuinak beren lekuetara itzuliko dituenik. Gauekok ere ipuina behar du lokartu ahal izateko.

Agian, lapurtutako ipuinak nahastuta, ipuin berri bat sor daiteke. Prest egongo zinatekete ipuinak berreskuratu, ipuin berri bat sortu eta Gaueko lokartzen saiatzeko?

Zure laguntza behar dugu

Jokoa argitaratzeko bidean gaude. Egin zure ekarpena eta lagundu GAUEKO mahai-jokoa etxeetara eta herrietara iristen.

Mahai-joko literario kooperatiboa

Euskaratik eta euskaraz sortutako mahai-joko literarioa da, literatura eta jolasa uztartzen dituen proposamen berritzailea. Sortzeko, berreraikitzeko, antzezteko eta elkarrekin kontatzeko espazioa eskaintzen duen jolas kooperatiboa da.

Hemen jolasa ez da soilik entretenimendua: garapen linguistiko, kognitibo eta sozialerako tresna egokitua ere bada.

Nondik dator ideia?

Hezkuntza-esperientzian eta egungo merkatuan hautemandako hutsuneei erantzuteko asmoz sortu da; Gradu Amaierako Lanerako proiektua izan baita.

Literaturaren lanketak ikuspegi akademiko eta zurruna du sarritan, eta mahai-jokoen merkatuak ez die beti modu orekatuan erantzuten adin-tarte guztien beharrei, ezta hizkuntza eta kultura aniztasunari ere.

Nori zuzentzen zaio?

5-8 urte bitarteko haurrengan pentsatuz garatu da, txikienentzako egokitutako jokoen gabeziari aurre egiteko.

Dena den, gaztetxo eta helduei ere luzatzen zaie gonbidapena, belaunaldien arteko zubiak eraikitzeko eta erronka elkarrekin gozatzeko.

Nor dago proiektuaren atzean?

Maren Urkizu Urruzola

Kaixo! Maren Urkizu Urruzola naiz, lasartearra. Haur Hezkuntzako gradua amaitzear nago, eta Liburutegietan eta Irakurzaletasunaren sustapenean espezializatu naiz.

Txikitatik maite dut literatura eta mahai-jokoen, eta, orokorrean, jolasaren mundua. Interes horretatik jaio da proiektu hau, hezkuntza-esperientzian eta merkatuaren hutsuneetan oinarrituta.

Nire Gradu Amaierako Lana izan da hau; atzean oinarri teoriko sendoa, bitartekarien eta merkatuaren azterketa eta jarraipen luzea ditu.

Eneko Martiarena Lopetegi

Aupa! Eneko Martiarena Lopetegi naiz, ni ere lasartearra. Haur Hezkuntzako irakaslea naiz, eta ilustratzen ere orduak ematen ditut.

Marenek proiektuaren berri eman zidan eta ea nik ere parte hartu nahi nuen galdetu zidan. Nola esango nion ezetz, bada, horrelako proposamen bati?

Ni arduratuko naiz jokoaren ilustrazioak sortzeaz, pertsonaiei bizia emateaz eta gainontzeko elementuei forma emateaz.

Jokoaren elementuak

Taulak lau gune nagusi ditu, izaki bakoitzaren bizilekua irudikatzen dutenak. Erdigunean Gauekoren txokoa dago: ilargi-erlojua, aztarna-txartelak uzteko lekua eta orri-zuridun liburua.

Pertsonaien eta ilargiaren piezak.
Aurkezpen-txartelak, izaki bakoitzaren izaera eta hizkera ezagutzeko.
55 aztarna-txartel: asmakizunak, aho-korapiloak eta onomatopeiak.
Hamar haur-ipuin klasikoren puzzleak, lau piezarekin: lekua, pertsonaia, objektua eta osagai garrantzitsua.

Abenturako protagonistak

Mari

Naturaren ama dela esaten da, eta izaki guztien gainetik dago. Mendi garaietako koba sakonetan bizi da, eta suzko gurdi batean ikus daiteke zeruan.

Tartalo

Begi bakarra du kopetan. Artzain erraldoia eta oso indartsua da; batzuetan beldurgarria, baina ez da oso argia eta erraz engainatzen dute.

Basajaun

Erraldoi iletsu bat da, basoetako erregea. Oso indartsua da, baina ez da gaiztoa; naturaren zaindaria baita.

Lamia

Emakume oso ederrak dira, ilehori luzea dutenak, baina ahate-oinak dituzte. Erreka bazterretan ikusten dira urrezko orraziarekin.

Prestaketa

Jokalariak lau taldetan banatu: Mari, Basajaun, Tartalo eta Lamia.
Talde bakoitzak bere pertsonaia irudikatzeko osagarri bat jantziko du.
Talde bakoitzari pertsonaiaren figura, aurkezpen-txartela eta ipuin bat emango zaizkio.
Ipuin-piezak taulan sakabanatuko dira, buruz behera eta ausaz.
Ilargia hasierako tokian kokatuko da, ezkerraldean.
Aztarna-txartel guztiak nahastu eta dagokion tokian utziko dira.

Pausuak

Taldeak aurrera egingo du.
Aztarna-txartel bat hartuko du.
Dagokion proba egin beharko du.
Proba gainditzen badu, ipuin-pieza bat jasoko du.
Proba huts egiten badu, ilargiak aurrera egingo du.
Beste talde baten pieza lortuz gero, trukea rol-jokoan hitz eginez egingo da.

Amaiera

Jokoa talde guztiek puzzlea osatu eta Gauekorengana iristen direnean amaitzen da. Gauekok liburu huts bat erakutsiko du, eta taldeek puzzleetako piezak erabilita ipuin berri bat asmatu eta ahoz kontatuko dute.

Helburua Gaueko lokartzea izango da. Talde guztiek elkarlanean lortuko dute ipuinak berreskuratzea.

Jokoaren taula, figurak eta kartak jolasteko prest.

Zailtasun-mailak

1

4 pieza

Ipuin tradizional bakoitzeko pieza batekin sortuko da bukaerako ipuina.

2

8 pieza

Talde bakoitzak bi pieza jarriko ditu istorio berria osatzeko.

3

12 pieza

Talde bakoitzak hiru pieza erabiliko ditu, erronka sortzaileagoa eginez.

4

16 pieza

Puzzle osoekin sortuko da bukaerako ipuina: talde bakoitzak lau piezak jarriko ditu.

Proben tipologia

Asmakizunak

Euskal mitologiako pertsonaiak, lekuak eta elementuak dituzte ardatz: Akerbeltz, lauburua edo Anboto bezalako erreferentziak.

Aho-korapiloak

Ahoskera, erritmoa eta arreta fonologikoa indartzeko, euskararen soinuekin jolasean arituz.

Onomatopeiak

Soinua, irudia eta kontakizuna lotzeko: oihartzunak, urratsak eta naturako soinuak modu ludikoan interpretatuz.

Oinarri teoriko eta praktiko sendoa duen jolasa

Proiektua nire Gradu Amaierako Lanetik sortu den heinean, oinarri teoriko zein praktiko sendo bat du atzetik. GrALaren defentsa egin ostean, lan osoa hemen argitaratuko da.

Bitartean, nire laneko atal batzuk aurreratu ditzaket. Ikerketari, marko teorikoari eta eranskinei egiten zaizkien erreferentziak lan osoa argitaratzean ulertuko dira.

Ahozkotasuna

Ahozkotasuna proposamen honen ardatz nagusietako bat da, hizkuntzaren garapenean duen funtzio zentralagatik. Proben egiturak, rol-jokoak eta istorioen sorkuntzak adierazpen espontaneoa, entzute aktiboa eta hizkuntza sortzailea sustatzen dituzte.

Euskal mitologia

Mari, Basajaun, Tartalo eta Lamia bezalako irudiek haurren hurbileko iruditeria sinbolikoa osatzen dute, eta euskal kultur ondarearekiko lotura indartzen dute.

Kooperazioa

Proposamena joko kooperatiboaren logikan oinarritzen da. Arrakasta ez da banakakoa, baizik eta taldearen arteko koordinazioaren eta komunikazioaren emaitza.

Belaunaldien arteko zubia

Adin ezberdinetako haurrek elkarrekin jolas dezakete, eta bata bestearengandik ikasi. Zaharrenek txikienei lagun diezaiekete beren gaitasunak lantzen eta mailaz igotzen.

GAUEKOren berriak bertatik bertara

Proiektuaren bidea jarraitu, zalantzak bidali edo elkarlanerako proposamen bat egin nahi baduzu, hemen gaituzu.

@gauekomahaijokoa Instagram gauekomahaijokoa@gmail.com Emaila